Pang-tuition, tiwala sabay naglaho

Dear Dr. Love,

Ako si Mirasol. Isa po akong ina na ang tanging pangarap ay mapagtapos ang aming mga anak.

Matagal naming pinag-ipunan ang perang nakalaan para sa tuition. Ipinagkatiwala ko iyon sa aking mister dahil siya ang nagsabing siya na ang bahala.

Pero nang dumating ang araw ng enrollment, wala na ang pera.

Nang tanungin ko siya kung saan napunta ang perang pang-tuition, tahimik lang siya. Wala siyang maibigay na malinaw na dahilan. Hindi siya nagalit, hindi rin siya nagpaliwanag. Ang tanging isinagot niya ay “pasensya ka na.”

Mas masakit pala ang walang sagot kaysa sa masakit na katotohanan. Paano ako magtitiwala kung hindi niya kayang sabihin ang totoo?

Habang ang anak namin ay nagtatanong kung makakapasok pa ba siya sa klase, ako naman ay hindi malaman kung paano bubuuin muli ang tiwalang tila kasabay ring nawala ng perang pinaghirapan namin.

Dr. Love, paano ko haharapin ang isang asawa na hindi marunong magsabi ng totoo, lalo na kung kinabukasan ng aming anak ang nakataya?

Mirasol

Dear Mirasol,

Ang perang nawala ay maaaring kitain muli, pero ang tiwalang nasira ay mas mahirap ibalik. Ang pinakamasakit sa iyong kuwento ay hindi lamang ang pagkawala ng perang pang-tuition, kundi ang pagkawala ng katapatan sa pagitan ninyong mag-asawa.

Maaaring nagkamali ang iyong mister. Maaaring may dahilan siya na ikinahihiya o kinatatakutan. Ngunit tandaan mo, ang pro-blema ay hindi lumiliit kapag tinatakasan.

Mas lumalaki ito kapag pinipiling manahimik.

Kausapin mo siya sa panahong kalmado ang inyong damdamin.

Ipaunawa mong hindi mo hinahanap ang perpektong asawa—ang kailangan mo ay isang asawa na marunong umamin, managot, at maki-pagtulungan sa pagbangon.

Ang katotohanan, kahit masakit, ay mas mabuti kaysa sa katahimikang sumisira sa pamilya.

At sa iyong mister, kung mababasa mo man ito, tandaan mo— ang isang ama ay hindi nasusukat sa rami ng perang naiuuwi, kundi sa tapang na panindigan ang kanyang mga pagkakamali.

Ang pag-amin ay hindi kahinaan—ito ang unang hakbang sa pagbawi ng tiwala.

Hindi pa huli ang lahat. Nasa iyo ang lahat ng pagkakataon para maitama ang lahat at makabawi sa iyong pamilya. Kaya huwag ka nang magsayang ng araw.

Dahil lalo lang magiging mahirap at komplikado ang situwasyon kung  patatagalin mo pa.

DR. LOVE