Archival wala pa makadawat sa CDO gikan sa DENR

CEBU, Philippines — Gibutyag ni Cebu City Mayor Nestor Archival, Sr. nga wala pa niya madawat ang cease-and-desist order (CDO) gikan sa Department of Environment and Natural Resources–Environmental Management Bureau (DENR-EMB)-7 kalabot sa paggamit sa South Road Properties (SRP) Pond A isip temporaryong garbage transfer area.

Ang DENR-EMB-7 nagkanayon nga niadtong Hunyo 18, 2026 wala gitugotan ang siyudad sa paggamit sa SRP isip garbage transfer station tungod kay wala kini permit hinungdan nga ang ahensiya niluwat kini og CDO niadtong Hunyo 7, 2026 batok sa operasyon sa basura diha sa SRP human makita ang mga paglapas sa mga lagda nga nagdumala sa solid waste management ug pagsagol sa nagkadaiyang matang sa basura nga supak sa Akta Republika 9003 kun “Ecological Solid Waste Management Act of 2000”.

Matud ni Archival nga nasayran niya nga adunay CDO human siya nakabasa og balita ug mga post sa social media kabahin sa maong mando apan wala pa naabot ang opisyal nga dokumento sa iyang buhatan.

Giingong nasayran nalang sa mayor nga gihatagan og 60 hangtud sa 90 ka adlaw ang siyudad aron sa paglimpiyo sa maong lugar sa SRP ug andam kini nga mosunod sa maong mando. Sayo pa, gituki ni Archival ang plano sa kagamhanan sa pagpatuman sa "No-Touch Ground Policy" sa pagdumala sa pagbalhin sa basura isip kabahin sa paningkamot sa pagsulbad sa mga reklamo sa baho nga basura diha sa SRP ug pagpalambo sa sestema sa waste management sa siyudad.  Apan tungod kay gidid-an na sa DENR ang paggamit sa SRP wala pa’y kasiguradohan kong mapatuman kini.

Sa pagkakaron, ang Lungsod sa Aloguinsan lang ang gilabayan sa mga basura gikan sa siyudad.

Gibutyag usab sa mayor nga dako na og naggasto ang siyudad tungod sa pagbiyahe sa mga basura ngadto sa Aloguinsan diin kapin sa P6,000 kada tonelada ang mabayaran alang sa pagdala sa basura ngadto sa maong lungsod.

Gikataho nga ang siyudad makagasto og P4.2 milyon matag adlaw diin kon sa Binaliw unta ibutang ang mga basura anaa lang sa P2.1 milyones ang inadlaw-adlaw nga gasto.

Matud ni Archival nga P65 milyones matag buwan ang gasto sa siyudad alang sa basura tungod sa mas mahal nga gasto sa pagdumala niini. Gipasalig ni Archival nga gipaspasan na usab nila og hakot ang mga basura sa SRP sulod lang sa 15 hangtud sa 30 ka adlaw. BDB BANAT NEWS