Katin-awan sa saming gipasanginlang inungu-an

sama kuno ka sa pak-an magabi-i

mani-id, mag-atang, tuyo lab-as tina-i

mangu-ot kasingkasing, itimpla sa karne

ug imong kalampusan paglamoy’g inosente.

kahadlukan kuno ang tunga ra mong lawas

ug hawod ka pa sa makalilisang mangtas

kaluha kuno ka sa nagpahiping halas

maong pagtamay kanimo dili panamastamas.

tulisok ra na nila, wa’y kusog nga pagtuok

nga bunga sa ilang mahadlukong pagkahinanok

nga gikan sa ilad sa mapahitas-ong pundok

nga nangangkong ila ang katungod sa pagtulisok.

‘wa ka’y gitaguan, sila’y naglikay-likay

rason dayon sila lahi imong panagway

maong ilang gibalaod pagsaway, pagbiay-biay—

lagda ug pamaaging nagkayabag, nagkagidlay.

lagi, lahi lagi, barog nimo’g hitsura

ug gikasiging nila ang pagbukal sa lana

apan kinsa’y nagtak-ang ning inulingang botelya

dili ba ang nagsulting banagbanag daganan ta?

tataw na ang imong pagsubang

wa na ka’y gikahadlukang panag-atbang

ungo ka man, sigbin, o tikbalang

paglaum ang dala mo sa paglingin sa bulan.

di ko masiguro ang inanay nga paghupas

sa mapalabi-labihong pulong sa maghinilas

apan sayod ko nga sa paglabang ta sa pikas

sugaton kita sa kahayag nga wa’y pu-as.

subli tang hayagan sa adlaw’ng nagpahiyum

sa matuod nga kahulugan sa katahum

kay sa lagda ug pagbati sa maalamong hukom

dili pirming ang lanog ang makagagahum.

sama kuno ka sa pak-an magabi-i

mani-id, mag-atang, tuyo lab-as tina-i

apan sayod ako nga wala ka’y giapiki

giamuma mo pa gani ang giyataka’g gipangwakli.

pakataw-a, patamaya, palibaka lang sila,

lain man gud kuno imong hitsura.

ayaw lang gud na ikasagmuyo, ikabalda,

kun gikasakit nilang kita’y matuod nga gwapa!