Kahoy ko, kahoy mo

Blag!

Daw mitig-ab

ang kahoy sa iyang

paghagsa sa yuta.

Nagngiyaw pa

ang chain saw --

daw katawa sa

unggoy nga hakog.

Mihilak ko

kay ang kahoy ko

giputol. Kasakit

hunahunaon -- nganong

pasipad-an sa mga

tampalasan? Kanindot

sa bugnaw’ng hangin

apan karon nadeliryo

ang kabukiran nga ang

alimpulo giupawan.

Baha!

Hain na ang gamot

nga mopugong? Mohilak

ug masuko ang kinaiyahan

kon ang gasa sa Diyos

amung-amongon. Magtanom

kog kahoy. Alimahan

ug ampingna. Tana!

kuyogi ako ug kita

maghugyon!