Pagsulod ug gawas sa mga baboy sa Cebu City i-ban

CEBU, Philippines — Gipatuman ni Cebu City Mayor Nestor Archival ang temporaryong pag-ban o pagdili  sa pagsulod ug pagpagawas sa binuhing baboy, lokal nga karneng baboy, mga produktong baboy ug mga by-products sulod sa teritoryo sa siyudad aron mapugngan ang pagsulod ug pagkaylap sa African Swine Fever (ASF).

Ang mayor sa Executive Order 86 nga gipirmahan niadtong Hulyo 10, 2026 nga subay sa Executive Order No. 39, Series of 2026 nga giluwatan ni Gobernadora Pamela Baricuatro nga nagpatuman usab og 45 ka adlaw nga temporaryong pag-ban sa buhing baboy, karne sa baboy ug mga produktong baboy gikan sa Negros Island ug uban pa’ng probinsiya nga apektado sa ASF.

Tumong sa mayor nga mapanalipdan ang panglawas sa publiko, masiguro ang food security ug mapanalipdan ang lokal nga industriya sa pagbuhi og baboy batok sa hulga sa ASF.

Nimando ang mayor sa Department of Veterinary Medicine and Fisheries (DVMF) ug ang bag-ong Cebu City African Swine Fever (ASF) Task Force nga makig-alayon sa Department of Agriculture, Bureau of Animal Industry, National Meat Inspection Provincial Veterinary Office, Philippine National Police, Philippine Coast Guard ug Cebu Port Authority sa hugtanong pagpatuman sa mga biosecurity, quarantine ug inspeksiyon sa mga baboy.

Bisan pa sa bag-ong mando, gitugotan ang paglihok sa buhing baboy ug mga produktong baboy kon kini otorisado ubos sa mga regulasyon sa mga nahisgutang ahensiya ug kong adunay kompleto nga veterinary permits, shipping documents, laboratory certifications ug ubang biosecurity clearances.

Gilakip sa executive order ang pag-umol sa Cebu City African Swine Fever (ASF) Task Force nga gipangulohan sa DVMF ug langkuban sa City Agriculture Office, Cebu City Disaster Risk Reduction and Management Office, City Legal Office, Cebu City Police Office, City Traffic Operations Management Office, Bantay Dagat, Public Information Office, Bureau of Animal Industry, Department of Agriculture, Cebu Ports Authority, Philippine Coast Guard, Cebu City Hog Raisers Association ug Central Visayas Pork Producers Association.

Ang task force maoy responsable sa pagplano, implementasyon, pag-monitor ug pagpatuman sa tanang preventive ug containment measures batok sa ASF.

Magpahigayon usab kini og inspeksiyon sa mga pantalan, checkpoint, merkado ug ihawan, pagpatuman sa quarantine ug biosecurity protocols, pagpalapad sa impormasyon ngadto sa publiko ug paghatag og rekomendasyon sa mayor kon gikinahanglan pa ang dugang nga mga lakang.

Gimando usab sa executive order nga ang tanang pampublikong merkado, ihawan, meat shops, supermarket, grocery, hotel, restaurant ug ubang establisemento nga nagbaligya, nagproseso, nagtipig o nag-apod-apod og binuhing baboy ug mga produktong baboy kinahanglang makapakita og veterinary health certificate, shipping permit, meat inspection certificate ug ubang gikinahanglang dokumento gikan sa mga otorisadong ahensiya. BDB BANAT NEWS