‘Irrelevant Questions’ ng ilang senator-judge, nagpapabagal sa VP trial

MANILA, Philippines — Nagbabala si Senator-Judge Panfilo “Ping” Lacson na ang mga “irrelevant questions” ng ilang kasamahan sa Senado ay nagpapabagal sa impeachment trial ni Vice President Sara Duterte-Carpio.

Ayon kay Lacson, bagama’t iginagalang ni Presiding Officer Francis Escudero ang bawat senator-judge, dapat din silang maging mas maingat sa pagtatanong.

“Sometimes kami ang nagpapabagal. Minsan hindi relevant ang tinatanong sa impeachment trial, bakit nasisi­ngit? I think we should be mature enough to discern ano ba ang puwede itanong para ma-clarify ang ‘di maintindihan,” ani Lacson sa DZMM.

Dagdag niya, ang pagpasok ng mga isyung malayo sa kaso ay nakakaabala at hindi kaaya-aya pakinggan.

Iminungkahi ni Lacson ang regular na caucus ng mga senator-judge upang paalalahanan ang lahat sa tamang asal at uri ng tanong na dapat ihain. Aniya, makatutulong ito para manatiling objective ang mga senador, lalo na kung ang ilang tanong ay bunga ng emosyon o personal na pagkiling.

Binanggit din ni Lacson na mabagal ang takbo ng paglilitis kahit pa nagpasya ang prosekusyon na bawasan ang bilang ng mga testigo.