PUERSA nipalig-on sa pagpangandam batok sa high risk incidents

CEBU, Philippines — Gipalig-on sa Philippine United Emergency Rescue Services Alliance (PUERSA) ang pagpangandam sa mga eskwelahan ug mga emergency responder batok sa mga high risk nga insidente pinaagi sa pagpahigayon og duha ka adlaw nga Tactical Emergency Casualty Care (TECC) training ug simulation exercise diha sa Don Sergio Osmeña, Sr. Memorial National High School sa Barangay Labangon, Dakbayan sa Sugbo kagahapon.

Ang pagbansay nga gihimo niadtong Sabado ug kagahapon nitapos sa usa ka full-scale simulation niadtong Sabado diin gisundog ang usa ka insidente sa pagpamusil sulod sa eskwelahan.

Gitambongan kini sa mga estudyante, kapolisan, kabomberohan, medical responders ug emergency rescue personnel aron ipakita ang koordinadong pagtubag sa panahon sa aktibong hulga.

Kabahin kini sa padayon nga kampaniya sa PUERSA sa pagpalig-on sa kahandam sa komunidad alang sa nagkalain-laing matang sa emerhensiya ilabina sa mga insidenteng hinimo sa tawo sama sa pagpamusil ug pagpamomba.

Matud ni Dr. Ted Esquerra, usa sa mga instructor nga ang maong pagbansay gituyo aron maandam ang mga estudyante ug emergency responders sa mga insidente nga mas nduol na sa riyalidad tungod sa nagkadaghang mga delikadong kaso .

Si Trinidad, usa usab ka trauma surgeon, combat medic corpsman ug TECC instructor nipasabot nga ang unang adlaw sa pagbansay nagtutok sa pagdumala sa tagsa-tagsa nga mga samad samtang ang ikaduhang adlaw nagtugot sa mga partisipante nga magamit ang ilang nakat-onan pinaagi sa usa ka realistic nga emergency simulation.

Samtang si Captain Don Azarcon, founder sa combat medic nagkanayon nga ang nag-unang tumong sa organisasyon mao ang pagbansay sa mga batan-on aron mahimong andam ug epektibong first responders. Gidawat usab ni Erald Geyrozaga, head ug adviser sa School Emergency Response Team (SERT) sa Don Sergio Osmeña, Sr. Memorial National High School ang pakigtambayayong sa PUERSA nga iyang gihulagway isip dakong tabang sa pagpalig-on sa disaster preparedness program sa eskwelahan. — /BDB (BANAT NEWS)