Bank, tax records ni VP Sara bubuksan na

MANILA, Philippines — Inaasahang mabubun­yag na sa publiko ang financial records ni Vice Pres. Sara Duterte at asawa nitong si Atty. Maneses Carpio matapos aprubahan nitong Lunes ng Senate impeachment court ang pagpapalabas ng subpoenas para sa mga bank records, dokumento mula sa Anti-Money Laundering Council (AMLC) at Bureau of Internal Revenue (BIR).

Ayon sa dokumentong binasa ni Sen. Francis Escudero, “The request for subpoenas directed to the concerned banking institutions, covering the accounts of the Respondent, Atty. Manases Carpio, separately or jointly, the partnership of Carpio Lawyers, and the nineteen listed corporate entities, is GRANTED.”

Pinagbigyan din ng korte ang pagpapalabas ng subpoenas sa 20 entities na iniuugnay kay VP Duterte, matapos makitaan ng “prima facie” base sa mga isinumiteng dokumento. Hiniling ito ng prosekusyon kaugnay sa alegasyon ng “unexplained wealth” sa ilalim ng Article II ng impeachment complaint.

Nilinaw ng hukuman na ang mga rekord mula 2007 hanggang 2021 ay mahalaga at may kaugnayan sa kaso, at hindi maituturing na “fishing expedition.” Ibinasura rin ang argumento ng depensa na ang mga ito ay “prior term records.” Gayunman, binigyang-diin ng korte na maaari lamang gamitin ang mga dokumento bilang bata­yan sa kasong nakahain, at hindi para magpasok ng panibagong impeachment ground.

Hindi naman pinagbigyan ang kahilingan na isama ang dollar accounts o foreign currency deposits, dahil sa “absolute secrecy” na nakasaad sa Republic Act 6426.

Ibinasura rin ang subpoenas para sa JTC Group of Companies Phili­ppines Inc. at Pikimong Pikimong Philippines Corp. matapos makita sa mga dokumento na hindi nakaugnay ang pangalan ni Duterte at Carpio sa mga naturang kumpanya.

Inatasan ang mga bangko, BIR, at AMLC na isumite ang mga dokumento sa Clerk of Court sa Hulyo 30, 2026, alas-9 ng umaga, sa harap ng mga abogado ng prosekusyon at depensa.