PRO-7 andam nga mo-assist sa LGUs sa guidelines

CEBU, Philippines — Andam nga mopatuman ang Police Regional Office (PRO)-7 sa mga guideline gikan sa Inter-Agency Task Force bahin sa bag-ong hulga sa COVID-19.

"Naa nay mga measures na gi-implement ang IATF, kita naman diri sa Central Visayas nag-monitor sab ta, so tuloy-tuloy lang’, matud ni Police Brigadier General Ronnie Montejo, direktor sa PRO-7.

Matud ni Montejo nga kong adunay higpit nga mga pagpatuman ug border controls ang PRO-7 andam nga mo-assist ngadto sa mga Local Government Units (LGUs).

Si Montejo nagkanayon nga ilaha usab nga giatiman ang mga frontliner nga polis aron malikayan nga sila mataptan sa virus ilabina sa bag-ong hulga sa COVID-19 strain.

"Ang nahitabo gyud hilabi pa tong sauna wala pa gyu’y nakabalo unsaon, karon kay at least naa natay mga lessons learned, so kini atong mga nahibaw-an pwede nato ni gamiton”, padayag ni Montejo.

Aron usab nga maprotektahan ang mga frontliner cop gilusad nila ang usa ka health station unit nga gilangkuban og mga polis nga adunay background sa medical aron kanunay nga susihon ug obserbahan ang kahimsog sa matag miyembro sa         kapolisan.

"Para sab mapangalagaan ang kalusugan sa kanya-kanya nga mga police personnel so from time to time gi-monitor tapos tagaan og mga kinahanglan, mga vitamin, tapos ang mga city health standards ginasunod diri sulod sa kapolisan”, matud ni Montejo.

Gibutyag usab ni Montejo nga ang polis mamahimo gihapon nga makapatuman sa minimum health standard protocols tungod kay ilaha na kining higpit nga gibuhat sulod sa ilang organisasyon.

"So, ang importante nga atong kapolisan naa unta sa maayo nga panglawas or condition ug layo sa infection mao nang kami mismo, mag-caution-nay mi sa usa’g-usa", dugang ni Montejo. —BDB (BANATNEWS)