Piso sadsad sa record low na P64 kada dolyar

MANILA, Philippines — Bumagsak ang halaga ng piso nitong Martes, Oktubre 27, at lumampas sa antas na P64 kada dolyar, ang pinakamababang halaga ng piso sa kasaysayan.

Ayon sa datos ng Bankers Association of the Philippines, nagbukas ang piso kahapon sa P63.93, dalawang sentimo lamang na mas mababa kumpara sa ­closing rate nitong Lunes, Oktubre 26, na P63.95.

Noong Lunes ang ika-limang magkakasunod na trading day na bumagsak ang piso, at ito na rin ang ika-32 pagkakataon ngayong taon na nagsara ang piso sa panibagong record low.

Gayunman, hindi nakikita ng Bangko Sentral ng Pilipinas (BSP) sa ngayon ang panga­ngailangang ipagtanggol ang piso.

“We have estimates of how much the peso has to move before it becomes inflationary, and that’s when we tend to intervene,” sinabi ni BSP Governor Benjamin Remolona Jr. noong nakaraang linggo.

Ang paghina ng piso ay nagdaragdag sa mga pressure na nakaaapekto sa pangkalahatang presyo ng mga bilihin, nakaiimpluwensiya sa inflation, at maaaring magpataas sa halaga sa piso ng pagbabayad sa mga obligasyong denominated sa foreign currency, kabilang ang utang sa mga external creditor.