Visayas Grid gipaubos sa extended red alert
CEBU, Philippines — Gipaubos sa extended red alert ang Visayas Grid kagahapon tungod sa kakulang sa power supply.
Matud sa National Grid Corporation of the Philippines (NGCP) nga gi-extend ang red alert gikan alas 3:00 sa hapon hangtud sa alas 9:00 sa gabii.
Yellow alert ang ipatuman ala 1:00 hangtud sa alas-3:00 sa hapon ug alas 9:00 hangtud sa alas 10:00 sa gabii.
Sa ala 1:30 sa hapon adunay 2,191 megawatts (MW) lang ang available capacity batok sa peak demand nga 2,420 MW.
Matud sa NGCP nga ang sitwasyon gumikan sa outage sa pito ka power plants, pagkunhod sa kapasidad sa 14 ka planta ug limitado nga power import gikan sa Mindanao.
Ug posible usab ang manual load dropping sa mga lugar nga giserbisyohan sa Visayan Electric, Mactan Electric Company ug Cebu Electric Cooperatives.
Samtang, nipatuman ang Visayan Electric og usa ka oras nga rotational brownout sa pipila ka bahin sa Sugbo aron mabalanse ang suplay ug panginahanglan sa kuryente.
Lakip sa naapektohan ang pipila ka lugar sa mga dakbayan sa Sugbo, Mandaue, Talisay ug Naga, mga lungsod sa Minglanilla, Consolacion ug Liloan.
Ang rotational brownout gipatuman sa nagkalain-laing lugar gikan ala1:00 sa hapon hangtud sa alas 8:00 sa gabii.
Giawhag sa NGCP ang publiko nga magmatngon ug magdaginot sa paggamit sa kuryente samtang hugot ang power supply sa Visayas Grid. — (BANAT NEWS)
- Latest
