Mga kaso ni Rama gibasura
CEBU, Philippines — Gibasura sa Seventh Division sa Sandiganbayan ang tulo ka kasong Anti-Graft and Corrupt Practices Act (R.A. No. 3019) batok kang kanhi Cebu City mayor Michael Rama ug lima pa ka laing akusado human napamatud-an sa korte nga walay igong basehan ang mga alegasyon ug napakyas kini sa sa paglatid og detalyadong mga kamatuoran kung aduna ba’y napahigayon nga ilegal nga kalihukan ubos sa iyang termino.
Gawas kang Rama, ang ubang mga akusado gilangkuban nila ni Leizl J. Calamba, Lyndon Bernardo J. Basan, Conrado A. Ordesta III, Janeses B. Ponce, ug Dominic A. Diño.
Sa usa ka resolusyon nga gipagawas niadtong Hulyo 16, 2026, ang korte nga pinangulohan ni Chairperson Associate Justice Lorifel Lacap Pahimna, nagmando sa paglibkas sa Hold Departure Order (HDO) batok sa tanang akusado ug gihatagan og pabor sa korte ang Manifestation with Omnibus Motion ni Rama sa pagpapas ang Criminal Case Nos. SB-25-CRM-0033 hangtod SB-25-CRM-0035 batok kaniya.
Matud sa korte, ang “amended information/s” o sumbong wala makahatag sa tukmang paghulagway sa espesipikong mga lihok o pagpasagad sa matag akusado nga nilapas kini sa Anti-Graft Law.
Ang mga kasong graft nagagikan sa mga kontratang gihatag niadtong Disyembre 2021 ngadto sa tulo ka pribadong kompanya nga mao ang Jomara Konstrukt Corporation (P4.99 milyones), ACM Hauling Services (P4.96 milyones), ug ARN Central Waste Management, Inc. (P35 milyones).
Ang korte nagkanayon nga ang pag-award lang sa kontrata ngadto sa mga pribadong kontraktor dili awtomatikong ilegal kung wala’y elementong kriminal sama sa “manifest partiality, evident bad faith, o gross inexcusable negligence.”
"The prosecution failed to depict even a glimpse of the acts or omissions allegedly committed by the accused which give rise to the perceived violation," matud sa desisyon.
Tungod sa pagbasura sa mga kaso, gimando usab sa korte ang pagpagawas sa mga piyansa nga gi-post sa mga akusado alang sa ilang temporaryong kagawasan, ubos sa naandang proseso sa accounting ug auditing.
Ang maong hukom gipirmahan usab nila ni Associate Justice Hans Chester T. Nocom ug Associate Justice Georgina D. Hidalgo.
Gikalipay ni Rama ang maong hukom.
“Sometimes surprises come any day and at any time”, simple ug mubo nga pamahayag sa kanhi mayor kun diin puno ang iyang dughan og pasalamat nga napamatud-an nga wala siya’y gihimong kalapasan sa balaod. — IBM BANAT NEWS
- Latest
