Bahrain hinataw ng Alas Boys sa AVC U18

MANILA, Philippines — Hinataw ng Alas Pilipinas Boys ang unang panalo sa 2026 Asian Volleyball Confederation (AVC) Boys’ U18 Championship matapos iligpit ang Bahrain, 25-22, 13-25, 25-23, 25-14, Lunes sa Wuyuan River Gymnasium sa Haikou, China.

Pumalo si Terrence Marticion ng 16 points mula sa 15 attacks at isang block, habang may 11 at 10 markers sina Raphael Galapin at John Howard Guerra, ayon sa pagkakasunod.

Bumangon ang Alas Boys mula sa naunang 17-25, 20-25, 13-25 kabiguan sa Iran para sa kanilang 1-1 kartada kapareho ng India sa Pool B.

Maghaharap ang Alas Boys at India ngayong ala-1 ng hapon kung saan ang mananalo ang makakasama ng Iran (2-0) sa quarterfinals.

“They showed heart in today’s match and I told the boys that we need this win for us to improve our chances [in making it to the next round],” ani Alas Boys coach Oliver Balse. “Next up is India and we want to give our all.”

Halos isang buwan at kalahati lamang naghanda ang tropa ni Balse.

“What’s different in today’s match is that they showed more confidence compared to our first outing,” wika ni Balse.

Magkakasama sa Pool B ang Korea (2-0), Japan (1-0), Saudi Arabia (0-2) at Australia (0-1) at nasa Pool A ang China (1-0), Chinese Taipei (0-2), Hong Kong (0-1) at Indonesia (0-1).

Ang Pool C ay binubuo ng Pakistan (2-0), Thailand (1-0), Kyrgyzstan (0-1) at Kazakhstan (0-2).