Lapu-Lapu City Heroes misidlak sa 8th Ateneo Cup

CEBU, Philippines — Human gibira ang korona sa Under 17 sa labing unang C-Bros Football Festival, ang Lapu-Lapu City Heroes misakmit na sab og tropeyo sa kampiyonato.

Ning higayona sa mas bata nga kategoriya.

Gigatongan sa impresibong salida ni Spencer Sven “Pensor” Lomadilla, ang Heroes nanghawod sa Under 9 division sa 8th Sacred Heart School-Ateneo de Cebu Football Cup ning bag-ohay pa lamang.

Si Lomadilla mibandera sa Heroes ngadto sa 1-0 nga pagpakaging sa Giuseppe FC sa una nilang duwa. Naka-iskor siya og laing goal sa 3-0 nilang paglampaso sa Cebu Football Club B sa wala pa miligid ang Heroes ngadto sa ikatulo nilang sagunson nga daog batok sa Team Magis, 1-0.

Sa knockout stage, ang Heroes ubos sa paggiya nilang coaches John Dave Regner, Khent Vincent Sotto, Joseph Estremos, ug Rylle Ancajas mipakita og igong katakos sa pagposte nila og sagunson nga daog ppinaagi sa penalty shootout.

Una silang nakaipsot batok sa Cebu United, 3-2, diin sila si Lomadilla, McJohnston Singh ug Xavier Cyn Arong naka-igo sa ilang mga tira. Ang tulo mao gihapon ang naka-iskor sa dihang gipalagpot sa Heroes ang  Sugbu Calidad, 3-2, aron pag-abante sa finals batok sa Cebu Football Club A.

Sa kampiyonato, si Lomadilla mitak-op sa dalaygon niyang performance pinaagi sa paglansang sa bugtong goal nga nagtuboy sa Heroes ngadto sa gihandum nilang titulo.

“I am happy to be part of the winning team and for scoring the winning goal,” matud pa ni Lomadilla.

Gawas nilang Lomadilla, Singh, ug Arong, ang ubang mga miyembro sa champion team mao sila si Daren Himaya, David Gad Inso, Seth Daniel Gacrama, Alexa Tumulak, April Tumulak, Eyana Rhaine Brillo, ug Paul Mavy Pajora.

Sa Under 11, ang Heroes A nakaabot sa Final Four.

Gibandera nilang Devin Jasper Gildo, Juan Iñigo Yu, Josiah Christian Peligrino, Scott Nathaniel Sucia, Mark Daniel Bacla-an, Asriel Josh Heredia, C-Raghnall Bendaño, Kenshen Artajo, John Raumar Nuñez, Dovin Shin, ug Austin Tyller Arong, ang Heroes A mipukan sa Canduman FC B, 4-0 ug Don Bosco C, 3-1.

Gipildi sila sa host Ateneo, 1-2, sa wala pa makatabla 1-1 uban sa DB Liloan pagkahuman sa group stage. Sa round of 16, ang Heroes A mipalagpot sa sister team nilang Heroes B, sa wala pa si Gildo mibitad kanila sa semifinals.

Apan ang Heroes, ubos sa pagtimon nilang coaches John Dave Regner ug Khent Vincent Sotto, napakyas pagtikang sa finals human sila miyukbo sa Sugbu Calidad, 0-2.