Lolong ‘General’ nagkasa ng baril, viral
MANILA, Philippines — Isang nakatatandang lalaki na nagpakilalang “General” ang viral ngayon sa social media matapos magkasa ng baril bago komprontahin ang isang driver na iligal umanong pumarada ng sasakyan sa kanyang lugar, sa Mandaluyong City.
Ayon sa Mandaluyong Police, iniimbestigahan nila ang insidente na naganap sa kanilang hurisdiksyon,
Napanood na umano ang nasabing insidente sa video kaya’t iniimbestigahan na ito at nangangalap ng mga nakasaksi. Gayunman, wala pang lumulutang sa Mandaluyong City Police Station para magsampa ng reklamo.
Batay umano sa video footage, ang lalaki na nagpakilalang “General” ay galit na nakatingin sa sasakyan at driver, habang nasa kabilang side ng kalsada, at bago tumawid ay kita ang pagkakasa niya ng baril.
Nagmura pa umano ang lalaki sa driver dahil nangangatwiran ang huli at sinasabing itinutok ang baril.
Naglabas naman ng komento sa social media si Metropolitan Manila Development Authority (MMDA) head ng Special Operations Group, Gabriel Go, na nagsabing kung totoong heneral ang lalaki, hindi umano dapat magkasa ng baril kahit pa naka-illegal parking ang driver at dapat na mas responsible siya sa pagkakaroon ng baril na hindi dapat ipanakot.
- Latest
