Pagkabayo sa flood scam

Usa sa kataposang pagsuway ni Alan Peter Cayetano sa pagpabilin sa puwesto isip presidente sa Senado mao ang pangangkon nga iya rang grupo maoy dunay kaisog sa pagpadayon sa pag-imbestigar sa flood-control scandal aron mailhan, makiha, ug masilotan ang labing dagkong kawatan.

Dihang naklaro nga nakakuha na si Senate President Sherwin Gatchalian sa ika-13 nga boto, nihirit pa g’yud si Cayetano sa pag-awhag nga ipabilin sa iyang grupo ang liderato sa Senate Blue Ribbon Committee aron pagseguro nga dili matabla ang trinilyon ka pesos nga nakawat sa flood scam.

-o0o-

Matinud-anon bang Cayetano bloc pagtiwas sa  imbestigasyon sa flood scam? O pantalya ra sama sa iyang pag-insistir niadtong 2020 nga magpabiling speaker sa House of Representatives, bisan lapas na sa term sharing agreement, hangtod mapasar ang nasudnong budget?

Mahibaw-an ang ilang interes sa flood scam pinaagi sa pagsubay sa gihimo sa 28 ka adlaw niyang Senate presidency. Human sa ilang pag-kudeta ni kanhi Senate president Tito Sotto niadtong Mayo 11 hangtod nga gitaktak sa bag-ong mayoriya niadtong Hunyo 3, wala sila kahimo og bisan unsang imbestigasyon sa flood scam.

-o0o-

Pulos kuwestiyonable ang duha ka nahimong imbestigasyon:

•         Public hearing nga gipangulohan nilang Alan Peter ug Pia Cayetano ug Rodante Marcoleta niadtong Hunyo 4, usa ka adlaw human taktaka sa ilang mga puwesto ug komitiba, uban sa 18 ka maleta boys; ug

•         Public hearing niadtong Hunyo 16, bisperas sa special session nga nipili ni Gatchalian pagka Senate president, nga gihimo sa gawas sa Senado, wala tungaha nilang Cayetano ug kaubanan, ug gidumala nilang Mike Defensor ug Atty. Levito Baligod.

Sukwahi sa ilang pagarpar, wala ka-imbestigar sa flood scam ang Cayetano bloc. Bisan kontrolado nilang Senado, wala nila mapatubag silang kanhi House speaker Martin Romualdez ug mga sakop sa Gabinete ni Presidente Ferdinand Marcos Jr. nga ilang giingon nga giduphan sa kanhi pangulo sa imbestigasyon nga si Senador Ping Lacson.

Kausik sa ?700 milyones nga gasto sa Senado ubos sa Cayetano bloc. Walay ikapanghambog sa mga magbubuhis. Gawas sa pagtago ug pagpa-ikyas nilang Senador Bato dela Rosa, peke nga atake sa Senado, pag-boykot sa mga sesyon, ug wala pagtuman sa gipasalig nga imbestigasyon.