Serbian spikers pinagulong mga Dominicans
MANILA, Philippines — Napigil ng Serbian mga spikers ang pagdurugo ng kanilang koponan matapos pagulungin sa tatlong sets ang Dominican Republic, 25-19, 25-23, 25-18, sa Philippine Leg ng Volleyball Nations League (VNL) women’s week 2 na inilaro sa PhilSports Arena sa Pasig City kahapon.
Nagliyab sa opensa ang 21-anyos na si Anja Zubic para tulungan ang Serbia na tuldukan ang limang sunod na kabiguan.
Nakatuwang ni Zubic sa pag-atake sa kaagahan ng laro si Nina Cajic para maakbayan ang Serbia sa panalo at ilista ang 2-5 karta sa event na inihahandog ng Philippine Sports Commission, (PSC) sa pamumuno ni chairman Patrick ‘Pato’ Gregorio.
Bago ang panalo ay nakatikim muna ng dalawang sunod na five-set losses ang Serbia sa mga kamay ng World No. 5 Japan at top-ranked Italy.
Inirehistro ni Zubic ang 15 points mula sa 12 attacks, dalawang blocks at isang service ace, habang bumakas si Cajic ng 12 markers kasama ang 10 kills at dalawang blocks para sa World No. 10 na Serbia.
Ang top eight teams pagkatapos ng three-week nine-leg preliminary stage ang uusad sa final round sa Macau.
May 5-0 record ang Japan na isa sa anim na bansang pumapalo sa Pasig City leg.
- Latest
