Senado kinalampag sa RBH6

MANILA, Philippines — Pinaalalahanan ni House Majority Leader at Zamboanga CIty Rep. Manuel Jose “Mannix” M. Dalipe ang Senado hinggil sa self-imposed deadline para pagtibayin ang panukalang amyenda sa “restrictive” economic provisions ng Konstitusyon.

Kasunod ito ng nakatakdang pagdinig ng special Se­nate subcommittee patungkol sa Resolution of Both Houses No. 6, o, “A Resolution of Both Houses of Congress proposing amendments to certain provisions of the 1987 Constitution of the Republic of the Philippines, particularly on Articles Xll, XlV and XVl.”

Ang RBH6 ay Iniakda nina Senate President Juan Miguel “Migz” Zubiri at Senators Loren Legarda at Juan Edgardo Angara.

Ani Dalipe, nagako si Zubiri kay Pangulong Ferdinand Marcos Jr. na aaprubahan ng mga senador ang naturang resolusyon bago ang Holy Week recess ng Kongreso sa March 23.

“We hold them to this commitment, which was even reported in the media. The House is just waiting for the Senate to approve RBH No. 6 so we can quickly adopt it,” aniya.

Aniya, napagtibay na ng Kamara sa ikatlo at huling pagabasa ang 54 sa 57 prio­rity bills na napagkasunduan ng ehekutibo at lehislatura sa Legislative-Executive Development Advisory Council (LEDAC) gayundin ang lahat ng panukala na tinukoy ng presidente sa kaniyang State of the Nation Address (SONA) noong Hulyo 2023.

Muli ring umapela si Da­lipe sa Senado na itigil na ang pagsisiyasat kaugnay sa PI, dahil pinahinto na ng Comelec ang pagtanggap sa mga lagda at ibalik na ito sa mga PI proponents.

Umaasa siyang tatapusin na ng Senado ang imbestigasyon sa PI at ituon ang atensyon sa pagpapasa ng RBH 6 sa lalong madaling panahon.