P3.48 trilyong investments, bunga ng foreign trips ni Pangulong Marcos
MANILA, Philippines — Ipinagmalaki ni Pangulong Ferdinand Marcos Jr. ang P3.48 trilyong investments na naiuwi niya sa Pilipinas mula sa sunud-sunod na biyahe sa labas ng bansa.
Sinabi ni Marcos na nararamdaman na ang mga pinaghirapang biyahe matapos malagdaan ang mga memorandum of understanding sa mga pinuntahang bansa na naglalayon na makaakit ng mas maraming mamumuhunan.
“So, we’re starting to go into the details of all of those MOUs and LOIs that people have seen us witnessing, mga pirma-pirma and exchanges sa different countries, (the signing of agreements and exchanges)” pahayag ni Pangulong Marcos kasunod ng pulong sa mga opisyal ng Department of Trade and Industry (DTI) at Office of the Presidential Assistant on Investment and Economic Affairs (OPAIEA), na naglalayong pagsama-samahin at sundin ang iba’t ibang pangako sa pamumuhunan.
“I can already report that some of the MOUs that we signed in Indonesia and in Singapore, mayroon ng resulta (already have results). And in fact, I think in the next couple of weeks, we will be starting to inaugurate some of these projects already,” dagdag ng Pangulo.
Ang OPAIEA na pinamumunuan ni Frederick Go ay nagsisilbing presidential delivery unit, na nagtataguyod ng priority investment at economic agenda ng Presidente, na tinitiyak ang napapanahong paghahatid ng mga proyekto sa pamumuhunan, mga kasunduan sa kalakalan, at mga pangako, bukod sa iba pa.
Iniulat ni Trade and Industry Secretary Alfredo Pascual na nasa 116 proyekto ang nakuha ng Pangulo sa mga biyahe na nagkakahalaga ng US$62.926 bilyon o P3.48 trilyon.
Sa pinakahuling biyahe ng Pangulo sa Japan noong nakaraang linggo, nakakuha ito ng US$13 bilyon na investment.
Sa state visit sa Indonesia noong Setyembre nakakuha ang Pangulo ng US$8.48 bilyon; Singapore, US$6.54 bilyon; Estados Unidos, US$3.847 bilyon; Thailand, US$4.62 bilyon; Belgium, US$2.20 bilyon; China, US$24.239 bilyon; at Japan, US$13 bilyon.
Sinabi ng Pangulo pagkatapos ng kanyang huling paglalakbay sa ibang bansa na ngayon ay oras na upang pagsamahin ang lahat ng mga pangako sa pamumuhunan at tukuyin kung ano ang kailangang gawin upang ang mga proyektong iyon ay sumulong.
“And the next item is going to be, we will have to converge all of the different agencies of government so that we are working off the same plan. ‘Yun ang gagawin natin That is what we will do, because we have to strike while the iron is hot,” pahayag pa ng Chief Executive.
- Latest
