Duterte idineklara May 9 elections bilang 'non-working holiday'
MANILA, Philippines — Pormal nang idineklara bilang special non-working holiday ni Pangulong Rodrigo Duterte ang ika-9 ng Mayo kasabay ng halalang 2022.
Ito ang ianunsyo ni Malacañang, Huwebes, sa pamamagitan ng Proclamation 1357.
"[There] is a need to declare Monday, 09 May 2022, a special (non-working) holiday to enable the people to properly exercise their right to vote," sabi ni Digong sa dokumentong inilabas sa media ngayong araw.
"[This is] subject to the public health measures of the national government."
Malacañang declares May 9, 2022 a special non-working holiday throughout the country #BilangPilipino2022 @News5PH @onenewsph pic.twitter.com/EQFoSQumY9
— Maricel Halili (@halili_maricel) May 5, 2022
Ipinahayag ng Palasyo ang naturang kautusan matapos hikayatin ng Commission on Elections, ilang labor rights groups at progresibong mga kandidato si Digong na ideklara ang isang special-non working holiday o regular holiday sa Lunes upang maengganyo ang publikong bumoto. Pangamba kasi nila, kailangan nilang lumiban sa trabaho at hindi makatanggap ng sahod para lang makaboto.
Una nang sinabi ng Kilusang Mayo Uno, Anakpawis party-list at ni senatorial candidate Neri Colmenares na madi-disenfranchise ang mga manggagawa't empleyado kung hindi ito magagawa lalo na't mayorya ng mga botante ay employed.
Aabot sa 45.48 milyon ang employed individuals nitong Pebrero, na siyang mayorya na ng 65.7 milyong registered voters sa loob ng Pilipinas, kung datos nitong Disyembre 2021 ang titignan.
Dahil special non-working holiday sa Lunes, "no work, no pay" ang kaayusang mangyayari. Gayunpaman, bibigyan ng dagdag 30% ng kanilang daily rate ang mga taong pipiliing magtrabaho sa araw na 'yon sa unang walong oras.
Kung rest day ng empleyado sa araw ng special non-working holiday ngunit nagtrabaho pa rin siya, kailangan niyang bayaran ng karagdagang 50% ng kanilang daily rate sa unang walong oras. — James Relativo at may mga ulat mula sa News5
- Latest
