'Terrorist plot' vs mga dayuhan sa Pilipinas, natuklasan ng PNP

MANILA, Philippines — Napag-alaman ng intelligence ng Philippine National Police (PNP) ang diumano'y pagtatangka ng isang foreign organization na maglunsad ng terorismo laban sa mga Westerners at middle eastern nationals na nasa Pilipinas.

Sa pahayag ng PNP, Martes, sinabing nakuha nila ang impormasyon sa isang local contact ng "Hamas," isang organisasyong kilala sa mga pagkilos nito laban sa bansang Israel at ilang pwersang Arabo.

"Our Filipino source identified the Hamas operative as 'Bashir' who was reportedly attempting to establish foothold in the Philippines with pledges of financial support to some local threat groups including militant extremists with links to the international terrorist organizations," ani Police BGen Neil Alinsangan, direktor ng PNP Intelligence Group.

"Coordination and information sharing with foreign and local counterparts disclosed that Bashir’s real name is 'Fares Al Shikli who, allegedly, is the head of Hamas’s Foreign Liaison Section. He has also an Interpol Red Notice and is charged with an Offense of Terrorism Logistic Support."

Ayon sa ulat, nagpabalik-balik ang source sa Malaysia mula 2016 hanggang 2018 kung saan nakipagkita siya kay Fares Al Shikli para pag-usapan ang posibleng pag-atake laban sa mga Israeli nationals sa Pilipinas kapalit ng suportang pinansyal mula sa Hamas.

Taong 2016 pa lang daw ay gino-groom na ni Fares Al Shikli ang source para maging local contact sa Pilipinas, habang binibigyan siya ng bomb-making training sa Malaysia.

Bago magtapos ang 2017, sinabi raw ni Fares Al Shikli sa source ang plano niyang magrekluta ng mga Pinoy na may kuneksyon sa mga local threat groups na pwedeng makatulong para pumatay ng mga Hudyo sa Pilipinas, maliban sa paglulunsad ng mga "rally" sa mga embahada at nagpapakalat ng video propaganda.

Hindi unang beses?

Dagdag ng PNP, hindi ito ang unang beses na nagtangka ang Hamas na maglunsad ng mga aktibidad sa Pilipinas.

Isang chemist daw kasing may kaalaman sa mga pampasabog, na may kaugnayan sa Hamas, ang naaresto sa Pampanga noong Enero 2018.

Ipina-deport ang nabanggit sa Turkey ang nabanggit sa pamamagitan ng Bureau of Immigration.

"This is a stern warning to all terroristic groups who plan to conduct recruitment and similar activities in the country," dagdag ni Alinsangan kanina.

"[We] have a way to know you and you cannot do your plans here because the PNP and AFP, through the active support of the community, are working together to preempt your devious plans."

Itinuturing ng Canada, European Union, Israel, Japan, United Kingdom at Estados Unidos ang Hamas bilang terrorist organization, habang tanging ang military wing lang nito ang kinikilalang terorista ng Australia, New Zealand at Paraguay.

Unang itinatag ni Hamas co-founder Sheik Ahmed Yassin ang grupo para palayain ang Palestine mula sa pananakop ng Israel. 

Matagal nang nababatikos ang Israel dahil sa human rights violations nito laban sa mga Palestino na kaagaw nila sa ilang teritoryo.

Kahit tinitignan bilang "terorista" ng ilan, suportado ng ilang Palestino ang paglaban ng Hamas sa Israel. — may mga ulat mula kay Franco Luna