Pension ng militar nanganganib, reporma hiling ipatupad na
MANILA, Philippines — Nagbabala si 2nd District Albay Rep. Joey Salceda na nagbabadya ang krisis sa sistema ng pensiyon sa Military Uniformed Personnel (MUP) o sa mga nasa unipormadong serbisyo kung hindi kaagad ito mairereporma para maisalba.
Sinabi ni Salceda, chairman ng House Committee on Ways and Means na sa kasalukuyan ay mayroong P9.6 trilyong ‘unfunded reserve deficit’ ang MUP dahil walang sistema ng masinop na ambag ang kasundaluhan sa pondo para sa pensiyon ng mga ito na higit na mataas kumpara sa mga sibilyang empleyado ng gobyerno.
Ayon kay Salceda ang problema ay dulot ng biglaang pagtaas ng sahod ng mga sundalo at pulis na ipinatupad na walang akma o kaakibat na reporma sa kanilang MUP.
Ayon kay Salceda, hindi ito binigyan ng pansin noon sa pag-aakalang kontrolado naman ang pensiyon pero sa kasalukuyan ay nakababahala na ang gastusin dito para sa unipormadong serbisyo na higit na malaki kumpara sa MOOE (Maintenance and Other Operating Expenses).
“Nangangahulugan itong higit na malaking bahagi ng taunang budget ang napupunta sa pensiyon ng mga retirado sa halip na pagbibigay ng akmang proteksiyon sa mga nasa aktibong serbisyo,” puna ni Salceda.
- Latest