Hatol sa ‘Maguindanao massacre’ inaabangan
MANILA, Philippines — Umaasa si 2nd district Maguindanao Rep. Zajid Mangudadatu na mahahatulan ang mga suspek sa Maguindanao massacre bago matapos ang termino ni Pangulong Duterte para mabigyan ng hustisya ang kanilang pamilya at mga biktima ng malagim na massacre.
Ayon kay Mangudadatu, nasabi na ni Pangulong Duterte na nais niyang maibaba ang hatol laban sa mga suspek sa massacre ngayong taon at masampahan ng kaso.
Para sa kongresista, na pinangunahan ang pag-alala sa mga mahal sa buhay na naging biktima ng pagpatay ng mga armadong lalaki na pinangungunahan ng suspek na si dating Datu Unsay Mayor Andal Ampatuan Jr., kahit siyam na taon na ang nakakalipas matapos ang malagim na trahedya ay nanatili pa rin ang sakit sa kanilang pamilya hanggang hindi nila nakakamit ang hustisya.
Naniniwala si Mangudadatu na sa tulong na lang ni Pangulong Duterte kaya mananaig ang nararapat na hustisya sa ating bansa.
Matatandaan na noong Nob. 23, 2009 naganap ang pagmasaker sa Barangay Salman sa bayan ng Ampatuan, Maguindanao, kung saan nasawi ang may 58 katao kabilang ang mga mamamahayag na magko-cover ng paghahain ng Certificate of Candidacy ni Gov. Ismael Mangudadatu.
Kabilang sa mga nasawi ang asawa ni Gov. Mangudadatu na si Genalyn, kapatid ni Congressman Mangudadatu at iba pang mga kamag-anak.
- Latest