24 PNP officers sinibak sa Espinosa slay
MANILA, Philippines - Sinibak na kahapon sa puwesto ni PNP Chief P/Director Gen. Ronald “Bato” dela Rosa ang 24 opisyal at mga tauhan ng Criminal Investigation and Detection Group (CIDG) 8 at Regional Maritime Group (RMG) matapos ang kaduda-dudang pagkamatay ni Albuera, Leyte Mayor Rolando Espinosa Sr. sa raid sa Sub Provincial Jail ng Baybay City, Leyte nitong Nobyembre 5.
Inanunsiyo ng PNP ang pagsibak sa 24 opisyal bago magsimula ang pagdinig ng Senado sa posibleng extra judicial killings sa pagkamatay ni Mayor Espinosa.
Si dela Rosa ay kasalukuyang kasama ni Pangulong Rodrigo Duterte sa trip sa Malaysia at Thailand.
Sinabi ni PNP Spokesman Sr. Supt Dionardo Carlos na ang 24 nasibak na mga opisyal at personnels ay isinailalim sa ‘restrictive custody’ sa Personnel Holding and Accounting Unit sa Camp Crame habang iniimbestigahan ng PNP-Internal Affairs Service at PNP-CIDG.
Kinilala ang 18 nasibak sa puwesto mula sa mga CIDG Region 8 sa pangunguna ng kanilang hepe na si Supt Marvin Wynn Marcos, Supt. Santi Noel Gaspang Matira, Chief Inspe. Leo Laraga na namuno sa raiding team sa raid sa nasabing jail, Sr. Insp. Eric Constantino, Sr. Insp. Deogracias Diaz III, Sr. Insp. Fritz Blanco, SPO4 Melvin Cayobit, SP04 Juanito Duarte, SP02 Alphinor Serrano Jr., SPO1 Benjamin Dacallos, P03 Norman Abellanosa, PO3 Johnny Ibanez, PO2 Neil Patrimonio Centino,PO1 Lloyd Ortigueza, PO1 Bhernard Orpilla, PO1, Kristal Jane Gisma, PO1 Jerlan Cabiyaan at PO1 Divine Songalia.
Anim naman sa RMG ang nasibak na sina C/Insp. Calixto Canillas Jr., Insp. Lucresito Candilosas, SPO2 Antonio Docil, SPO1 Mark Christian Cadilo, PO2 John Ruel Doculan at PO2 Jaime Bacsal.
- Latest
