Pangalan ng bagyong Nonoy pinalitan ng PagAsa ng Nona
MANILA, Philippines – Agad pinalitan ng pamunuan ng PagAsa ang pangalan ng bagyong Nonoy sa bagyong Nona na pumasok sa Philippine Area of Responsibility kahapon.
Ito ayon kay Glaiza Escullar, weather forecaster ng PagAsa ay dahil sa ang Nonoy ay kasingtunog ng palayaw ng Pangulong Benigno Aquino III na Noynoy.
Kahapon , nang pumasok na sa PAR si Nonoy ay agad agad itong pinalitan ng PagAsa ng pangalan ng bagyo na Nona. Ani Escullar ang pagpapalit ng pangalan ng bagyo ay desisyon ng matataas na opisyal ng ahensiya.
“The reason behind it is they said the name sounds like the nickname of the President, referring to President Benigno Aquino III’s nickname, “Noynoy””ayon kay Escullar.
Hindi umano maganda na tawagin ang bagyo sa pangalan ng Pangulo ng bansa dahil inaasahan itong magdadala ng epekto sa bansa.
Anya katulad noong 2002, ang bagyong Gloria ay pinalitan agad ng pangalang Glenda dahil kapangalan ito ng nooy Pangulong Gloria Arroyo.
Isa ding bagyo na may pangalang Kanor ang pinalitan ng pangalang Karding noong 2014 dahil ang pangalang Kanor ay kapangalan ng isang indibidwal na naging kontrobersiyal sa isang sex video.
Karaniwan tinatanggal naman ng PagAsa sa talaan ng pangalan ng mga bagyo ang isang bagyo kapag ito ay may matinding epekto sa bansa tulad ng bagyong Ondoy.
Alas-5 ng hapon kahapon, ang bagyong Nona ay namataan ng PagAsa sa layong 795 kilometro ng silangan ng Guiuan, Eastern Samar taglay ang hangin na umaabot sa 75 kilometro bawat oras malapit sa gitna at may pagbugso ng hangin na umaabot sa 90 kilometro bawat oras.
- Latest
