Rep. Leni tatakbong VP ni Roxas kung...

MANILA, Philippines - Tatakbo si Camarines Sur Rep. Leni Robredo bilang running mate ni DILG Secretary Mar Roxas sa 2016 Elections kung siya ay ‘indispensable.’

Sinabi ni Robredo sa radio interview na sasabak siya bilang ka-tandem ni Roxas kung indispen­sable siya o kailangang-kailangan ng Liberal Party (LP).

Subalit sa ngayon umano ay hindi niya opsyon ang pagsali sa Vice Presidential race, lalo’t may mga mas mahuhusay, mas handa at mas popular kaysa sa kanya.

“Mahirap sabihin kasi hindi talaga opsyon. Si­guro (tatakbong Vice President) kung indispensable ako! Pero ngayon kasi, hindi ko nakikita na darating yung punto na yun,” ayon pa kay Robredo.

Kung mayroon naman umanong makakapagpabago ng pasya ng kongresista sa ngayon ay kung katulad ito ng nangyari noong 2010 elections.

Noong 2010 ay ayaw umano talaga nitong kumandidato subalit dumating sa puntong indispensable siya at sumubok hanggang sa nanalo bilang kinatawan ng ikatlong distrito ng Camarines Sur.

Dagdag pa ni Robredo na usap-usapan lamang ang pagiging running mate niya kay Roxas at sa katunayan ay walang pang pormal na alok, lalo na mula kay Pangulong Aquino.