Driver dedo sa karibal
MANILA, Philippines - Selos ang nanaig nang makitang may kahawak-kamay ang dating live-in partner kaya nagawa umano nitong saksakin sa dibdib ang sumulot sa kaniya sa Port Area, Manila, kamakalawa ng gabi.
Dead-on-arrival sa Gat Andres Bonifacio Hospital ang biktimang si Cresencio Milagrosa Jr., 53, truck driver, hiwalay sa asawa, ng Block 17, Zone 14, Baseco compound, Port Area, Manila bunga ng tinamong saksak sa kaliwang dibdib.
Nagtatago na umano ang suspek na kinilalang si Jerson Lastina, ng Cavite City.
Sa ulat ni SPO3 Glenzor Vallejong Manila Police District-Homicide Section, dakong alas -11:00 ng gabi nang mamataan ng suspek na magkahawak kamay ang dati nitong kinakasama na si Lyn Tarrago at ang biktima habang naglalakad galing sa isang grocery sa Port Area, Maynila.
Habang papalapit na umano sa madilim na lugar kung saan nag-aabang ang suspek ay bigla nitong nilapitan at walang sabi-sabing pinagsasaksak ang biktima.
Nabatid na nakipaghiwalay umano si Tarrago sa suspek at sumama ito sa biktima at hindi umano matanggap ito ng suspek.
Nakuha naman sa crime scene ang isang 10-pulgadang kutsilyo na ginamit sa krimen.
- Latest
