CA, DOJ nabulabog sa bomb threat
MANILA, Philippines - Binalot ng tensiyon ang Court of Appeals (CA) at Department of Justice (DOJ) matapos makatanggap ng tawag at text na pasasabugin ang dalawang tanggapan ng mga nakatanim na bomba sa Ermita, Maynila kahapon.
Unang naganap ang pananakot dakong alas 9:00 ng umaga, kung saan kinumpirma ng security personnel ng CA na si Ricky Regala ang tawag na natanggap ng guwardiyang si Edwin Gonzales mula sa di nagpakilalang babae na may bombang sasabog sa main building ng CA kaya dapat palabasin ang mga empleyado.
Ipinabatid ito kaagad kay CA Justice Remedios Salazar Fernando kaya pinalabas ang mga empleyado at itinawag sa Manila Police District-Explosive and Ordnance Division.
Halos isang oras na hinalughog ang gusali na nag-negatibo sa anumang pampasabog, batay sa team leader na si SPO3 Modesto Pagara ng EOD.
Pinabalik na ang lahat ng kawani ng CA dakong10:40 ng umaga.
Nagtataka ang mga mahistrado kung bakit may bomb threat gayung wala naman umanong pagdinig na isinasagawa kahapon.
Hindi pa nagtatagal ang tensiyon, dakong alas 12:00 ng tanghali nang lumipat naman ang tensiyon sa tanggapan ng DOJ sa P. Faura st., katabi lamang ng CA, matapos makatanggap umano ng text message ang DOJ prosecutor na si Benito Sales na nagsasabing may sasabog sa ika-2 palapag ng gusali.
Isinagawa din ng EOD ang paghalughog at wala ring nakitang anumang bomba sa loob ng DOJ builÂdings kaya muling pinabalik ang mga empleyado.
- Latest
