Chinese vessel naialis na sa Tubbataha

MANILA, Philippines - Tuluyan nang naialis kahapon ang sumadsad na Chinese fishing vessel sa Tubbataha reef, ayon sa Philippine Coast Guard (PCG).

Kinumpirma ni Commander Armand Balilo, tagapagsalita ng PCG na, dakong alas-2:20 ng hapon nang mahila na ang FV Min Long Yu mula sa pinagsadsaran nito.

Nabatid na hinatak ang nasabing fishing vessel ng tug boat na MT Limay na ipinadala ng Malayan Towage Salvage Firm.

Magsasagawa naman ang MT Limay ng underwater hull inspection para masuri kung may pinsalang tinamo ang fishing vessel bago ito ibiyahe patungo ng Puerto Princesa.

Iniutos naman ni PCG Commandant Rodolfo Isorena na pagdating sa Puerto Princesa ay dapat na isailalim sa detailed inspection ang FV Min Long Yu.