6 oras na trabaho lang sa mga buntis

MANILA, Philippines - Isinusulong ng isang mambabatas ang pagtatrabaho ng anim na oras sa halip na walo kada araw para sa mga buntis na nag-oopisina o nagtatrabaho sa pabrika.

Sa House Bill 5031 o ”Pregnant Women Workers Act” na inihain ni Bacolod Rep. Anthony Golez, inilahad nito ang kahalagahan ng pamilya at pantay na proteksyon sa ina at sa ipinagbubuntis nito.

Giit ng mambabatas, mahirap ang buhay sa kasalukuyan kayat ang tradisyunal na ang lalaki lamang ang nagtatrabaho ay hindi na uso.

Ayon kay Golez, sa ngayon ang mga babae, maging dalaga o may-asawa ay bahagi ng work force ng bansa at kahit buntis ay napipiltan pa ring maghanapbuhay kaya nalalantad ang mga ito sa lahat ng uri ng stress na nakakaapekto sa kanilang mga sanggol.

Dahil dito kayat mas nangangailangan ng karagdagang pahinga ang mga buntis upang maka-iwas sa kumplikasyon dala ng pagdadalantao. 

Sa ilalim ng panukala, ang mga nagtatrabahong buntis ay papayagang makapagtrabaho ng hanggang anim na oras kada araw at tatanggap ng kaparehong sahod na ibinibigay sa nagtatrabaho ng walong oras.