Regular working day ngayon - P-Noy

MANILA, Philippines - Pinanindigan ni Pa­ngulong Benigno Aquino III na hindi niya idedeklara na special non-working holiday ang Nov. 2 (nga­yon).

Sinabi ni Pangulong Aquino sa Palace repor­ters sa pagdating nito mula sa Vietnam kamakalawa ng gabi sa NAIA terminal 2, iniisip niya ang kapakanan ng mga daily wage earners.

Aniya, idineklara na niyang special non-working holiday ang Nov. 1 kaya hindi na kailangang ideklara pa muling holiday ang Nov. 2.

Wika pa ng Pangulo, may mahabang weekend na ang Filipinos kung saan ay puwede nilang dalawin ang kanilang pumanaw na mahal sa buhay mula Sabado, Linggo at Lunes kaya hindi na kailangang ideklara na special holiday ngayon (Nov. 2).

Nagdesisyon naman ang Pangulo na dalawin ang kanyang magulang na sina dating Pangulong Cory Aquino at Sen. Ninoy Aquino Jr. sa Manila Memorial Park sa Parañaque ngayon (Nov. 2).