Expiration sa kasal binara sa Senado
MANILA, Philippines - Kinontra ng ilang senador ang panukala ng isang partylist group na lagyan ng 10 taong expiration ang kasal na papabor sa kababaihan.
Ayon kay Senate Minority Leader Aquilino Pimentel Jr., ang nasabing ideya ng party-list group na nag-aambisyong makapasok sa House of Representatives ang pinaka-nakakatawang ideya na narinig niya sa buong buhay niya.
Ayon kay Pimentel, hindi rin naaayon sa Konstitusyon ang nais mangyari ng 1-Ako Babaeng Astig Aasenso dahil ikinokonsidera ang pamilya bilang pundasyon ng lipunan.
Hindi rin naaayon sa nakakarami ang ideya na paglalagay ng sampung taong expiration sa marriage contract dahil ito ay panghabambuhay.
Ayon naman kay Senator Alan Peter Cayetano, siguradong hindi seseryosohin ang nasabing panukala dahil marami pa rin ang hindi nagkokonsidera na magkaroon ng diborsiyo sa Pilipinas.
Sumang-ayon din ito sa sinabi ni Pimentel na ‘basic unit’ ng society ang pamilya at hindi dapat maging daan ang gobyerno upang mawasak ito.
Sa statement naman ng 1-ABAA, nais umano nitong hindi na maghintay ng matagal ang mag-asawa sa mahabang proceedings ng annulment kaya dapat magkaroon ng expiration ang kasal. (Malou Escudero)
- Latest
- Trending
