Sa C5 road issue, Jamby at Ping kuryente na, sablay pa

MANILA, Philippines - Sinabi kahapon ni Na­cionalista Party Spokesperson Gilbert Remulla na nilalangaw na ang pag­dinig ng Senado sa isyu ng kontrobersyal na double insertion sa budget ng pro­yekto sa C5 Road na isina­sangkot kay Senador Manny Villar.

Pinuna ni Remulla na sumablay at kuryente pa ang ibinibintang nina Se­nators Panfilo Lacson at Jamby Madrigal kay Villar kaugnay ng naturang pro­yekto.

Matapos anya ang isang taon, 16 na pagdinig, at walang humpay na pag­subok sa pagbakbak kay Villar, wala nang masung­kit na pangdiin dito sina Lacson at Madrigal.   

Inihalimbawa ni Re­mulla ang isa pang pag­dinig kahapon na, rito, lu­mitaw na walang bahid ng anomalya sa C5 batay sa testimonya ng kinatawan ng Adelfa properties at ng Bureau of Internal Revenue.

Idinagdag niya na, tulad sa pagdinig kahapon, ma­rami na ang bakanteng upuan ng mga senador at mga tagamasid. “Di na rin ka­ilangan ng mikropono sa session hall. Sa konti ng tao madaling magkaka­rinigan. Me echo pa,” sabi pa ni Remulla.

Lumalabas na puro kasinungalingan diumano ang mga akusasyon laban kay Villar na kandidatong pre­sidente ng NP sa hala­lan sa 2010.

Mistula anyang nadu­rog na singpino ng pulbos ang mga argumento nila Lacson at Madrigal.

Naipa­liwanag ng ma­ayos ni Ginoong Anastacio Adria­no, dating Chief Operating Officer ng Adelfa properties na walang bahid ng ano­malya ang transak­syon sa C5. Ayon naman kay retired at dating Revenue District Officer Car­melita Ba­cod, nagbayad ng tak­dang bu­wis ang grupo ni Sena­dor Villar ng maganap ang transaksyon sa mga lupang pinag-uusapan.

Kaugnay nito, iginiit ni Remulla na dapat humingi ng paumanhin sina Lacson at Madrigal kay Villar at bayaran ang pondong nagastos sa mga pagdinig sa C5.

“Kung hindi kayang mag-sorry, eh magpasala­mant na lang sila kay Sen. Villar dahil sa dami ng na­biya­yaan sa C5 project at umalwan ang biyahe ng mga moto­rista,” dagdag pa ni Re­mulla. (Butch Quejada)