Pinugutan na?

MANILA, Philippines - Balot ng matinding phobia ang buong Sulu mata­pos kumalat ang text messages sa lalawigan na napugutan na umano ang dalawang dayuhang mi­yem­bro ng International Committee of the Red Cross (ICRC) na bihag ng Abu Sayyaf.

Ayon kay Jolo Mayor Hussein Amin, kumalat rin sa text na nasugatan ang bihag na si Swiss national Andreas Notter nang tangkain ni­tong tumakas sa takot na siya ang ma­pugutan ng ulo kung saan ay nabaril uma­no ito ng mga bandido at nasa kri­tikal na kondis­yon.

Ngunit nilinaw ni Amin na ang lahat ng ito ay pa­wang mga espekulasyon lamang at wala pang ma­linaw na kumpirmasyon hangga’t walang pruweba o di napapatunayan.

“We need proof of life, otherwise it’s all speculations,“ ani Amin na uma­pela sa mamamayan na huwag munang magpanic dahil wala pang katiyakan ang kumakalat na mga balita.

Una ng sinabi ni Sulu Gov. Abdusakur Tan, pinu­no ng ICRC Crisis Committee na ligtas sa ngayon ang mga biktima at walang napugutan ng ulo kaya naman bukas muli ito sa negosasyon sa ASG.

Kasabay nito, naka­tang­gap ng ulat ang Task Force ICRC na nagtatang­ka nang tumakas ang ASG mula sa kuta ng mga ito sa bahagi ng Mt. Tukay sa Parang at Indanan, Sulu kaya naman agad na uma­lerto ang tropa ng militar at pinalibutan ang nasabing lugar upang masakote ang mga Ito.

May 2,000 pulis at civilian volunteer ang ibinalik sa kagubatan ng Sulu para ipitin ang Abu Sayyaf dala ang misyon na walang palulusutin na bandido.

Ibinagsak na rin ang signal ng cellphone sa In­danan at Parang kaya wala ng linya ng komuni­kasyon doon.

Sinuspinde na rin ng Philippine National Police ang bisa ng lahat ng Permit to Carry Firearms Outside Residence sa Sulu para matiyak ang peace and order habang nasa Ilalim ng state of emergency. Tiniyak naman ni PNP Civil Security Group Director C/Supt. Ireno Ba­colod na mahaharap sa ka­ukulang kaso ang sinu­mang lalabag dito.

Nakaalerto na rin ang National Disaster Coordinating Council (NDCC) sa posibilidad ng ma­ lawa­kang paglilikas ng mga residente sa ilang bayan ng Sulu sa oras na mag­karoon ng bakbakan sa pagitan ng militar at ASG.

Una dito, kinumpirma ni Interior and Local Government Secretary Ro­naldo Puno na buhay pa sa ngayon ang mga bik­tima.

Aniya, sa monitoring ng Crisis Management Committee, walang pinugutan sa mga bihag na sina Swiss national Andreas Notter, Italian Eugenio Vagni at ang Pinay Engineer na si Marie Jean Lacaba na may 79-araw ng hawak ng ASG mula ng dukutin ang mga ito noong Enero 15.

Muli rin nanawagan ang ICRC sa ASG na huwag sasaktan ang mga biktima bagama’t natapos na ang ultimatum ng mga ito kapalit ng total pullout ng militar sa naturang probinsiya.