Matapos Ma-Ospital Sa Japan, First Gentleman nasa St. Luke's na

Nakabalik na kaha­pon sa bansa si First Gentleman Mike Arroyo matapos isugod sa os­pital sa Osaka, Japan ha­bang nasa kalagit­na­an ng flight patungong Peru kasama si Pangu­long Arroyo para du­ma­lo sa 16th Asia-Pacific Economic Cooperation (APEC) summit.

Bandang alas-2 ng hapon nang lumapag ang Hawker lear jet sa Villamor Air Base na si­nakyan ng Unang Gi­noo. Agad itong idine­retso sa St. Luke’s Medical Center kung saan siya nga­yon naka-confine.

Nabatid na kamaka­lawa ng gabi habang nasa biyahe ay biglang nakaramdam ng pana­nakit ng likod at tiyan ang Unang Ginoo kaya napi­litan ang piloto ng PAL na mag-emergency landing sa Kansai International Airport sa Japan.

Agad na dinala sa isang ospital sa Japan si FG, pero tumuloy pa rin ang Pangulo kasama ang kanyang delegasyon sa Peru kung saan nag-stop­over sila sa Los Angeles, California.

Idineklara naman ng mga Japanese doctors na ligtas na sa anumang panganib si FG matapos ma-diagnose na diarrhea lamang umano at hindi atake sa puso ang nara­nasan nito.

Matatandaan na halos 2 taon na simula nang unang sumailalim sa angio­plasty si First Gentleman. Disyembre 1, 2006 nang dalhin siya sa St. Luke’s at Disyembre 3 nang isa­gawa ang operasyon sa kanya.

Matapos ang apat na buwan, April 8, 2006, ha­bang nasa Baguio ay isi­nugod siya sa St. Louis Medical Hospital dahil sa chronic gastritis. Kinabu­kasan dinala uli siya sa St. Luke’s at dito na napag-alaman na mayroon si­yang dissecting aortic aneursym kung saan sumailalim siya sa triple bypass operation.

Nabatid na ang dissecting aortic aneurysm ay ang paglobo ng isang bahagi ng aorta, ang malaking ugat sa puso na nagsusuplay ng dugo sa iba’t ibang bahagi ng katawan.

Karaniwan umanong nangyayari ang gani­tong sakit sa mga lala­king edad 40-70 anyos. (Butch Quejada/Malou Escudero/Ellen Fernando)