Janjalani isunod na - GMA

Matapos mapatay si ASG spokesman Abu Sabaya, iniutos kahapon ni Pangulong Arroyo na isunod na ang iba pang lider ng Abu Sayyaf na sina Khadaffy Janjalani, Abu Sulaiman, Isnilon Hapilon, Hamsi Raji Sali at lahat ng mga kampon nito.

Ayon sa Pangulo, kailangang matahimik na ang Mindanao laban sa panggugulo ng Abu Sayyaf.

Iginiit rin kahapon ni National Security Adviser Roilo Golez na wala nang duda ang Malacañang na patay na si Sabaya.

Sinabi ni Golez na lumabas na ang lahat ng indikasyon at ang kulang na lang ay ang katawan ni Sabaya.

Ayon kay Golez, kabilang sa pinagbatayan ng pamahalaan sa pagkumpirmang patay na si Sabaya ay ang mga deklarasyon ng sundalo na nakabaril at sinuportahan ito ng mga arestadong miyembro ng Sayyaf na kasama mismo ni Sabaya sa pump boat.

Hindi anya dapat pang pag-usapan ang anumang pagdududa sa pagkamatay ni Sabaya. (Ulat ni Ely Saludar)