CEC tracksters misidlak sa FCAAF National Games

CEBU, Philippines —  Ang mga batan-on apan masaarong atleta sa Cebu Eastern College (CEC) ubos sa paggiya ni coach Maria Dolores “Sagay” Sagarino-Opoc mikab-ot og laing malampuson nga kampanya sa Filipino Chinese Amateur Athletic Federation (FCAAF) National Games 2025 didto sa Pasig City ning bag-ohay pa lamang.

Si Julienne Eve Yap misidlak nga labing hayag sa tanang mga Easternian nga nakamedalya uban ang upat ka golds ug tulo ka silver hinungdan nga gikoronahan siyang Most Outstanding Athlete sa Girls 10 Under division.

Nakamina si Yap og duha ka bulawan sa 4x50m ug 4x100m relay kauban ang igsoon niyang si Joeie Eireen Yap, Claire Dabon ug Julianne Claro.

Ang ilang grupo mipugnit sab og silver sa 4x200m relay.

Si Julienne milangkat og duhang duha ka golds sa softball throw ug high jump ingon man kaluhang silver sa long jump ug 4x100m mixed relay kauban silang Joeie Yap, James Washington Ong ug Jhon Christian Paraguso.

Sila si James Ong ug Paraguso milabni og laing tulo ka silvers sa 4x50m, 4x100m ug 4x200m relay sa Male D category kauban silang Hans Niño Ibenfred Ong ug Shaun Andrei Animo. Mao kini ang naghimo kanilang overall champion sa Boys 10 Under age group.

Si Paraguso mikubit sa ikalima niyang silver sa 200m run samtang miangkon og bronze sa 100m run.

Gawas sa ilang gold sa relay, sila si Julianne Claro ug Claire Dabon mikablab sab og bronze sa long jump ug high jump ingon man si Joeie Yap sa 100m run.

Si Rhisiart Theon Jayme miamot og bronze sa Male C 100m run samtang ang CEC Baby Dragons mibira og silver sa basketball 18 Under.