Melindo nangandam sa malisud nga hagit

CEBU, Philippines — Sa edad nga 34 anyos, si Milan “El Metodico” Melindo aduna pay ikabuga aron mamahimong world champion og usab.

Mao kini ang pagtoo sa bag-o niyang trainer nga si Fernando Ocon mao nang ilang gipahugtan og maayo ang ilang preparasyon alang sa comeback figth ni Melindo dinhi sa Sugbo tulo ka semana gikan karon.

Si Melindo (38-5, 14KOs), nga kanhi naghari sa IBF ug IBO flyweight division atol sa mabulokon niyang panahon uban sa ALA Gym, makigsangka batok sa beteranong Thai nga si Chaiwat Buatkrathok (38-7, 25KOs) alang sa bakanting OPBF Silver featherweight belt sa main event sa "Prime Fight II" sa Prime Stags Sports Boxing Promotions karong Enero 11 sa Cebu City Sports Center.

"Sa ako nakita, grabi ang iya improvement kay i-push man pud niya ang iya kaugalingon sa among training matag adlaw," matud pa ni Ocon, nga kanhi gipasidunggan nga "Trainer of the Year" human iyang gihashasan og maayo si Marlon Tapales aron mamahimong world champion pipila ka tuig na ang milabay.

Si Melindo katapusang mipakita og aksiyon atubangan sa mga Sugbuanon niadtong 2017 diin iyang gibuntog ang South African nga si Hekkie Budler pinaagi sa split decision aron sakmiton ang IBF ug IBO flyweight titles didto sa Waterfront Cebu City Hotel and Casino.

Apan human niini, misukarap ang karera ni Melindo sa dihang nakatilaw siya og tulo ka sagunson nga pilde didto sa Japan, ang katapusang duha pinaagi sa TKO batok nilang Kenshiro Teraji ug Junto Nakatani.

Sa miagi niyang away, ang garbo sa Cagayan de Oro City midaog batok sa kababayan niyang si Crison Omayao niadtong Abril 2 didto sa Southern City Colleges sa Zamboanga City.

Si Ocon miangkon nga daghan pa kaayo sila og angayan nga trabahoon apan masaligon siya nga si Melindo andam mosagubang sa malisud nga hagit nga nag-atang kaniya sa unahan.

"Dako hinoon kaayo ni nga challenge nga iyang sagubangon pero maningkamot gyud ang team namo sa Prime Stags Promotions nga ma-alalayan si Milan padung sa iyang tinguha nga ma-world champion og balik. Kaya pa kaayo ni niya nga makab-ot sa umaabot," dason pa ni Ocon.