Spit on Them, Labangon Reapers pabiling way pilde

CEBU, Philippines — Ang Spit on Them ug Labangon Reapers nagpabiling way pilde sa Sunday Night Hoops didto sa City Sports Club-Cebu gym.

Si Jeano Rallos mikadlit og 20 puntos uban ang upat ka rebounds ug us aka assists sa dihang gipaksit sa Spit on Them ang Night Squad, 65-41, aron pahugtan ang ilang pagkupot sa solong liderato bitbit ang perpektong 3-0 record.

Wala sab magpa-alkansi si Glenmark Estinozo nga mikolekta og 12 puntos, walo ka rebounds, duha ka steals ug usa ka block alang sa Labangon Reapers nga nakaipsot sa Brazzers, 45-41,alang sa ikaduha nilang sagunson nga daog.

Sa laing bahin, ang CP Construction ug White Wolves gisubhan og daog sa ilang pagsalmot sa bag-ong naporma nga liga.

Ang CP Construction mipatilaw sa Parokya ni Edgar sa una niining pilde, 54-52, samtang ang White Wolves midagit sa Rustans, 58-47.

Si Amir Batiancila maoy nangu sa CP Construction uban ang 29 puntos, unom ka rebounds ug lima ka assists, samtang si Ian Sulit ang bida sa White Wolves uban ang 16 puntos, lima ka rebounds ug usa ka assist.

Sa laing resulta, ang Castille mipakgang sa duha nila ka sunod-sunod nga pilde human gilampaso ang Space Jam, 65-45.

Si Jarrold Flores mikimada og 18 puntos, unom ka rebounds ug tulo ka assists sa unang daog sa Castille.