PBA Governor's Cup mosikad na
CEBU, Philippines — Ang giatngan nga 46th PBA Governor's Cup mosikad na karong adlawa uban ang duha ka kulbahinam nga aksiyon didto sa Ynares Sports Arena sa Pasig City.
Seguradong masentro ang atensiyon ngadtong Arwind Santos, ang nine-time champion uban sa Miguel Beermen nga moabli og bag-ong panid sa iyang karera uban sa NorthPort.
Ang gibansagan nga "Spiderman" mo-debut sa Batang Pier batok sa Alaska Aces sa pasiunang duwa nga gikatakda sa alas-3 sa hapon.
Pagabidahan ni import Cameron Forte, si Santos mobanat kauban sila si Robert Bolick ug Greg Slaughter sul-ot ang uniporme sa NorthPort.
Natayming nga ang kanhi team ni Santos nga San Miguel molumbati sab batok sa NLEX Road Warriors sa alas-6 sa gabii.
Si Brandon Brown gipaabot nga maoy motimon sa kampanya sa SMB samtang ang NLEX magsandig sa ekspolisong si KJ McDaniels.
Ning panapos sa season nga komperensiya sa liga diin ang mga teams dunay mga imports, lima ka adlaw ang mga duwa matag semana gikan sa Miyerkules ngadto sa Dominggo.
Ang torneyo magsubay og single round robin format diin ang 12 ka teams magbugno alang sa luna sa Top 4 nga dunay twice-to-beat advantage sa quarterfinals Best-of-five ang semis samtang best-of-seven ang kampiyonato.
- Latest
