Pinal nga desisyon naa sa kamot ni Pacquiao
CEBU, Philippines — Si Hall of Fame trainer Freddie Roach maoy responsabli paghulma ni Manny Pacquiao gikan sa usa ka hilaw nga talento ngadto sa usa ka bangiitang boksingero.
Sukad nag-abot ang ilang dalan sa labing unang higayon duha ka dekada na ang milabay, si Pacquiao wala pa mailhi apan ubos sa paggiya ni Roach, misulbong siya ngadto sa tumang pagkasikat sa tibuok kalibutan.
Sa daghang mga tuig nilang panag-uban, panahon man sa kaayuhan o kalisdanan, way duda nga si Roach nasayud kon unsay labing maayo alang sa giisip niyang labing ngilngig ug labing hait niyang tinun-an.
Si Roach mibutyag nga gibati siya og kabalaka sa gipakitang away ni Pacquiao batok ni Cuban champion Yodernis “54 Milagros” Ugas upat ka adlaw ang milabay didto sa T-Mobile Arena sa Las Vegas, Nevada.
Wala na ang tatak nga kusog ug kaabtik ni Pacquiao ug klarong mibahar na ang iyang abilidad sa dihang gipilde kini pinaagi sa unanimous decision ni Ugas, nga milampos pagdepensa sa iyang WBA ‘Super’ welterweight title.
Ang iyang nakita sa 42-anyos nga si Pacquiao nakahatag ni Roach og butang nga iyang hinukogan.
“You know, I’m a little worried about it, yes,” angkon pa ni Roach sigun sa taho ni Keith Idec sa boxingscene.com.
Human sa makapakurat nga kapildihan ni Pacquiao, mibunok gilayon ang mga panawagan alang sa Pinoy ring legend nga moretiro na.
Na-establisar na ang iyang legasiya ug segurado na ang iyang luna sa kasaysayan, nagtoo ang minilyon ka fans ni Pacquiao nga wala na siyay angayan pang pamatud-an ning puntoha sa mabulokon niyang karera.
Mao sab ang gibati ni Roach apan alang kaniya, si Pacquiao lamang maoy makadesisyon kabahin sa iyang ugma.
“He’s boxed a long, long time, and he’s boxed with me for a long time. And he’s my best customer I’ve ever had. He’s the best guy, the best fighter,” dason pa ni Roach. “And, you know,I hate to see that day when he retires. But this could be it. He didn’t have a great performance (vs Ugas), but we’ll see what Manny decides”.
- Latest
