Team Frasco Friendship Ride mosikad sa Pebrero 27

CEBU, Philippines — Ang kongresista sa ikalimang distrito nga si Vincent Franco “Duke” Frasco mopasiugda og dinungan nga #TeamFrasco Friendship Ride sa tanang mahiligon og biseklita sa Sugbo karong Pebrero 27.

Manukad kini sa Titay's Liloan bus stop ug ang ikaduhang starting point sa Bingay gym sa Borbon. Ang mga partisipante mosubay sa matahum nga talan-awon sa ikalimang distrito sa Lalawigan sa Sugbo.

Mag-abot sila sa lungsod sa Carmen diin adto nila tapuson ang sinikaray sa naila nga Cebu Safari and Adventure Park, usa sa mga nagpaluyo sa maong kalihukan.

Lain pang mga nipaluyo niini mao ang kagamhanan sa lungsod sa Carmen, Liloan ug Borbon, Titay’s, Frasco Premium Water, Sunstar, Y101 Cebu, Motor Ace Philippines Inc., Smart Communications Inc. ug Coca-Cola Beverages Philippines Inc.

Isip usa ka madasigong atleta, kinsa malampuson sa daghang dagkung mga lumba sa marathons ug triathlon  dinhi ug sa laing nasud, gitan-aw ni Kongresista Duke ang paugnat sa kusog nga makahatag og kinatibuk-ang kaayohan sa katawhan samtang gipalambo ang lokal nga turismo ug pagsuporta sa lokal nga pamatigayon ug tingusbawan.

Tuyo sab ni Frasco nga mapakaylap sa tibuok distrito ang himsog nga estilo sa kinabuhi, disiplina sa kaugalingon, pakig-uban ug kahiusahan.

“It's an opportunity to make positive impact in the midst of this pandemic by helping our constituents keep their physical and mental health,” matud ni Frasco.

Isip pagtuman sa kasamtangang health and safety protocols sa Covid-19, ang mga mosalmot kinahanglang magsuot og masks ug mopirma og health declaration forms sa dili pa ang lumba.

Adunay registration fee nga P100, libre na niini ang event shirt, post-ride snacks, freebies ug raffle. Ang moapil makaangkon sab og a 50 porsiyento nga diskwento sa regular ticket alang sa usa ka adlaw nga pagsuroy sa Cebu Safari, apil ang pamilya sa mga seklista nga mokuyog atol sa maong adlaw.

Mahimong magparehistro sa 7-Eleven atbang sa Liloan Municipal Hall, Plaza Food House & Balwarte ni Vossing sa Carmen ug sa Cong. Frasco Borbon Satellite Office sa Borbon.

Ang registration kutob lamang karong Pebrero 24.