Alang ni 'El Presidente' nasud una kaugalingon

CEBU, Philippines — Giyukboan siya isip usa sa labing banggiitan nga magduduwa sa kasaysayan sa PBA. Unang mihimo og pangan isip collegiate star sa University of San Carlos (USC) Warriors, si Ramon 'El Presidente' Fernandez nagbilin og daghan kaayong dili mapapas nga marka sa mabulukon niyang karera sa labing unang prospesyonal nga liga sa Asya.

Ang 6-foot-5 nga sentro maoy all-time leader sa PBA sa pinuntosay (18, 996 pts), rebounds, blocked shots, free throws made ug playing minutes. Ikaduha sab siya sa assists, games played ug steals.

Apil sa dili maihap nga dungog nga nakab-ot ni Fernandez sud sa 19 niya ka seasons sa liga mao ang rekord nga 19 ka titulo. Mikulit siya og laing rekord isip labing una ug bugtong player nga nakadaog og upat ka MVP award sa upat ka managlahing teams uban sa Toyota (1982), Beer Hausen (1984), Tanduay (1986) ug San Miguel Beer (1988).

Unom ka higayon nga naapil sa All-Star ug 13 ka higayon sa Mythical First Team, si Fernandez miagak sab sa San Miguel Beermen ngadto sa makasaysayanong grandslam niadtong 1989. Apan alang ni Fernandez, mahug nga palaman na lamang ang mga indibidwal nga pasidungog nga iyang naangkon.

Matud pa ni Fernandez nga iyang gikonsiderar ang pagka-miyembro niya sa national men's basketball team nga nagrepresentar sa nasud sa nagkadaiyang mga internasyonal nga kompetisyon isp maoy labing taas ug labing ngilngig nga dungog nga iyang nakab-ot.

As edad na 18-anyos, sakop si Fernandez sa Phl Youth team nga naka-gold sa 1972 ABC Under 18 Championship. Pagka sunod tuig, apil na sab siya sa Team Phl nga naghari sa ABC Men's Championship didto gihapon sa Manila. Nakapakita sab siya og aksiyon sa 1974 FIBA World Championship didto sa Puerto Rico.

Sa katapusan niyang salida isip usa ka national athlete, si Fernandez nakadawat og silver medal atol sa 1990 Asian Games didto sa Beijing, China.

Upat ka tuig ang milabay, hingpit siyang miretiro sa PBA.

"All of my individual awards are just icing on my cake," matud pa ni Fernandez. "Making it to the national youth team at 18 years old, and with the national men's team the following year are my greatest feat because that is the reason why I played basketball. That is really my childhood dream, and I'm very proud, happy and fulfilled that I have done that."