PBA Season 45 pamub-an
CEBU, Philippines — Nakahukom ang PBA Board nga pamub-an ang Season 45 sa liga gumikan sa paglugway sa enhanced community quarantine taliwala ning coronavirus pandemic.
Pinaagi sa usa ka online video-conference nga gipatawag ni PBA chairman Ricky Vargas niadtong Martes, ang Board of Governors nagkauyon nga ang labing maayong solusyon sa nabaraw nilang season tungod sa virus mao ang pagpahigayon niini ngadto sa duha ka kompresensiya na lang imbes nga tulo.
Kun wala pa gihapoy maayong kalamboan sa sitwasyon sa panglawas sa nasud, ang mga opisyales sa liga nangandam sa posibilidad nga usa na lang ka torneyo ang mahitabo ning tuiga.
"Two conferences na as of now. We’ll convene again before April 30," matud pa ni PBA commissioner Willie Marcial segun sa taho sa The Philippine STAR, igsuong mantalaan sa Banat News.
"Pag nagdire-diretso, posible na one conference na lang," dugang pa niya.
Nagkanayon si Marcial nga ang PBA Board nakakab-ot sa maong desisyon kay ilang gikonsiderar ang kaayohan ug kaluwasan sa tanan.
- Latest