Cousins moduwa na sa playoffs
CEBU, Philippines — Gikompirmar ni kanhi All-Star center ug US Olympian DeMarcus Cousins nga mobalik siya og duwa uban sa Los Angeles Lakers karong NBA playoffs.
Bisan pa og naglawig ang Lakers sa Western Conference, ang mga fans sa Lakers gusto gihapon nga makaapil si Cousins nga ilang gihulagway mopalig-on og samot sa koponan nga nagtinguha mosakmit sa NBA title ubos sa liderato ni Lebron James.
Si Cousins miingon nga paspas iyang recovery ug mihimo na siya og mga ginagmay'ng ensayo human sa iyang ACL injury atol sa off-season.
Ang 6-foot-10 nga si Cousins nagkanayon nga andam siya modawat bisan unsa nga papel ihatag ni coach Frank Vogel inig balik niya sa korte.
Gikalipay usab sa ilang team captain nga si James sa maayong dagan sa recovery ni Cousins nga sa iyang pagtuo makapalapad og maayo sa ilang tsansa sa NBA finals.
"Listen, first, his health is the thing we're mostly engaging in and watching him. And he's progressed every single day, every single month," matud ni James.
Sa wala pa siya gikuha sa Lakers ug ma-injury, si Cousins mi-average og 16.3 points ug 8.4 rebounds uban sa Golden State Warriors sa miaging season.
- Latest
