Nadasig sa 'mamba mentality', irving mipabuto og 54 puntos

CEBU, Philippines — Si Kyrie Irving mipasundayag sa iyang "Mamba mentality" pinaagi sa pagpabuto og 54 puntos aron pangulohan ang Brooklyn Nets nga mitumba sa Chicago Bulls, 113-118  sa NBA kagahapon didto sa Barclays Center sa New York.

Sa dalaygon niyang salida, si Irving mipasud og 19 sa 23 niya ka itsa. Wala siya'y sipyat sa nag-unang 10 niya ka tira.

Human sa duwa, gipabuhagay ni Irving ang rason sa iyang pagmangtas. Ang 'Mamba mentality' nga iyang nakat-onan ni Kobe Bryant nga niadto lamang Lunes namatay human nahagsa ang gisakyan niining helicopter nga mikalas og walo ka lain pang kinabuhi, apil na ang 13-anyos niining dalagita nga si Gianna.

"I hit a few shots in first half, so I just kept it going," matud pa ni Irving. "The Kobe mentality, and Mamba mentality kept me going. It felt good."

Mao kadto ang ikaduhang higayon nga si Irving mitali og dili momenos 50 puntos karon nga season ug ikaupat sa kinatibuk-an sa iyang karera. Ang iyang career-high 57 puntos iyang nahimo niadtong 2015 sa dihang nagduwa pa siya sa Cleveland Cavaliers.

Sa laing duwa, si Pascal Siakam mibahog og 30 puntos sa dihang gilampaso sa Toronto Raptors ang Detroit Pistons, 105-92 alang sa ika-10 nilang sagunson nga daog.

Miamot si Serge Ibaka og 21 puntos, si Fred VanVleet dunay 16 puntos, walo ka rebounds ug siyam ka assists, samtang si Norman Powell mitunol og 12 puntos, pito ka rebounds ug tulo ka steals alang sa Raptors.