3 SMB players pabiling suspendido

CEBU, Philippines — Hapit na matapos ang tuig, apan wala pa libkasa ni PBA Commissioner Willie Marcial ang 'indefinite suspension' nga iyang gipahamtang sa tulo ka players sa San Miguel Beermen.

Nasayran, nga sa wala pa sugdi ang PBA Governors' Cup, gisagpa og bug-at nga silot ni Marcial sila si All-Star Arwind Santos, Kelly Nabong ug Ronald Tubid human magkarambola atol sa ilang team practice. Apil usab sa kasamok ang import nga si Dez Wells, apan wala siya siloti human mapamatud-an nga wala siya'y sala.

Nagsugod ang lamok-lamok dihang   gidasmagan ni Santos si Wells atol sa usa ka play ug wala kauyon ang import ug iyang giduol si Santos. Imbes nga uwangon gisugat hinuon og sukmag ni Tubid si Wells. Miapil si Nabong, kinsa milaban ni Wells ug mipatumba ni Tubid pinaagi ang usa ka sukmag.

Ang mga opisyales sa Beermen nga sila si coach Leo Austria ug team manager Gee Abanilla miangkon nga wala pa sila masayod kon kanus-a malibkas ang suspensiyon sa tulo.

Sa laing bahin,  pabilin pa usab nga suspendido si Calvin Abueva sa Phoenix Fuel Masters.