CEBU, Philippines — Wala makauyon ug nadismaya si Blackwater Elite forward Mac Belo sa gibuhat sa kadagkoan sa iyang koponan pag-trade sa ilang super rookie nga si Ray Parks Jr. ngadto sa TNT KaTropa.
Gikataho sa PBA.com niadtong Huwebes nga miuyon na ang Blackwater sa trade diin ilang buhian si Parks bugti nila ni Don Trollano, Anthony Semerad ug duha ka future draft picks.
Wala pa kini mahingpit tungod kay sa Lunes pa ang pagbalik sa opisina sa PBA Commissioner's office, apan masaligon ang duha ka kampo nga aprobahan ra kini.
Si Belo nagkanayon nga wala makatabang sa ilang kampanya ang kanunay nga pagkalambigit sa Blackwater sa mga trades tungod kay maapektohan niini ang dagan sa sistema sa koponan kon adunay bag-ong players nga mosulod.
"Mahirap ding mag-adjust kasi pabago-bago especially during the season. Okay sana kung offseason madaling maka-pick up," matud pa ni Belo.
Gawas ni Parks, una na usab nga nakig-trade ang Blackwater ngadto sa Meralco Bolts diin ilang gibuhian ang kanhi Gilas Pilipinas shooter nga si Allein Maliksi ug Mike DiGregorio bugti ni KG Canaleta ug Mike Tolomia.