Alin Team-A Pabiling Lider Sa ABCC INTER-BROKERAGE CUP 2019

Cebu, Philippines- Giinat pa og maayo sa Alin Team-A (Alin Customs Brokerage) ang nagkutay nilang daog human nila pildiha ang Quickserver, 84-76 sa Aduana Basketball Club Cebu (ABCC) Season 2 Inter-Brokerage Cup 2019 niadtong Huwebes diha sa Cebu Port Authority (CPA) gym sa north reclamation area.

Si Jerry Singson mibirada og 20 puntos, upat ka rebounds ug upat sab ka assists aron pangulohan ang Alin Team-A nga mao na lang ang bugtong team sa bracket B nga wala pa'y pilde sud sa upat ka duwa.

Mihabwa sab og 12 puntos si Chris Perolino alang  sa   Alin Team-A nga nakabawi human maalkanse og siyete puntos sa first period, 14-21 pagtapos sa second quarter.

Gikan sa ilang 41-39 nga abante, ang Alin Team-A mikalingaw og inat sa ilang labaw hangtod nga miabot kini ngadto sa 61-56 human sa tulo ka kuwarter.

    Maayo unta ang dagan sa duwa sa Quickserver pagsugod, apan wala sila makalahutay sa makaya untang  kumbati tungod sa kakulang nila og tawo.

Ang Quickserver gipangulohan ni Jonnas Cayanong nga mikadlit og 17 puntos, gisundan nilang Kikoy Castro ug Ramel Aniñon nga adunay 12 puntos matag usa.

Nagtampohay og 11 puntos silang Rashid Tacocong ug Genson Antolijao alang sa Quickserver nga napadpad sa ikaduhang dapit sa standing bitbit ang 3-1 nga baraha.    

Sa pasiunang duwa, ang Rongcales Customs Brokerage mirehistro sa ikaduha nilang daog pinaagi sa pagpukan sa Alas Logistics Corp.

Gipangulohan ni Richard Moral ang kadaogan pinaagi sa iyang 14 puntos, unom ka rebounds ug duha ka assists nga igo na kaayo aron ilhon siyang best player of the game.

Sila si Radnie Rivera, Karl Daculan ug Adrian Laborte miambit og 10 puntos matag usa sa 2-2 nga Rongcales nga mitala sa ilang komportabling labaw, 43-28 human sa first half.

Ang Alas gipangulohan sab ni Ryan Saavedra nga mibundak og 20 puntos, samtang  si Josephus Ryan Zafra mihirit og 11 puntos sa pilderong koponan nga adunay 1-3 win-loss record.

Ang mga duwa ubos sa superbisyon ni league commissioner Sidney Ganapin.

PUNTOS MATAG USA

Unang duwa:

RONGCALES (81) – Moral 14, Rivera 10, Daculan 10, Laborte 10, Caynila 8, Cabrera 6, Bacor 4, Latonio 4, Valenzuela 3, Samson 2, Gabe 2.

ALAS (73) – Saavedra 20, Zafra 11, Alejano 8, N. Medalle 8, Lapinid 6, Entrampas 4, Sillar 4, Ciabo 4, Roma 2, Marata 2, Jemira 2, Laguna 2.

Ikaduhang duwa:

ALIN TEAM-A (84) – Singson 20, Perolino 12, Into 9, Filoteo 8, Calo 8, Palero 6, Villomo 6, Estorgio 4, Lleve 3, Barral 2, Alin 2.

QUICKSERVER (76) – Cayanong 17, Castro 12, Aniñon 12, Tacocong 11, Antolijao 11, Quilantang 8, Tan 4, Soco 3, Arevalo 3, Inhambre 2, Labor 2.