Duncan balik sa spurs isip assistant coach
CEBU, Philippines – Ang gi-idolong basketbolista sa San Antonio nga si Tim Duncan mobalik sa poder sa Spurs isip usa sa mga assistant ni coach Gregg Popovich.
Gihangop og maayo sa Spurs ang desisyon ni Duncan ug gani si Popovich usa sa mga mi-abiba kaniya.
"It is only fitting, that after I served loyally for 19 years as Tim Duncan's assistant, that he returns the favor," matud pa ni Popovich segun sa opisyal nga pamahayag nga giluwatan sa Spurs.
Si Duncan nga nakadaog og lima ka NBA titles uban sa Spurs, padayon nga mitabang sa Spurs sukad pa sa iyang pagretiro niadtong 2016.
Sa dul-an duha ka dekada niyang pagtinir sa San Antonio, si Duncan nagbilin og legasiya isip all-time leader sa puntos, rebounds ug blocks sa Spurs.
Ikauban ni Duncan si Will Hardy isip usa sa mga assistant coaches ni Popovich.
- Latest
